ახალი შესაძლებლობები: ევროპული ინტეგრაციის სარგებელი ქართული ბიზნესებისთვის

ავტორი: თამარ ღუნაშვილი

სტრატეგიული კომუნიკაციების მიმართულების ხელმძღვანელი

გაეროს გლობალური შეთანხმების საქართველოს ქსელი

ახლა, როდესაც საქართველო ევროპული ინტეგრაციის გზას აგრძელებს, კერძო სექტორის როლი უფრო მეტად მნიშვნელოვანია, ვიდრე ოდესმე.

ამ გადამწყვეტ მომენტში, მნიშვნელოვანია, რომ ქართულმა ბიზნეს სექტორმა დანერგოს მდგრადი პრაქტიკა და საქმიანობა შესაბამისობაში მოიყვანოს ევროპულ სტანდარტებთან, რაც ხელს შეუწყობს როგორც ეკონომიკურ ზრდას, ასევე, სოციალურ და გარემოსდაცვით მდგრადობას.

რა სარგებელს მოუტანს ევროპული ინტეგრაცია ქართული ბიზნესს?

ევროკავშირის ერთიანი (შიდა) ბაზარი: ევროკავშირის მთავარი ეკონომიკური ძრავა – ერთიანი (შიდა) ბაზარი საშუალებას იძლევა, პროდუქცია, მომსახურება, ფინანსური რესურსები და მოქალაქეები თავისუფლად გადაადგილდნენ ევროპის კონტინენტის მასშტაბით.  შეუფერხებელი გადაადგილება ამარტივებს ოპერაციებს და აფართოებს ქართული კომპანიებისთვის შრომის გაცილებით მასშტაბურ ბაზარზე წვდომას. 

მობილობა და თანასწორი მოპყრობა: ევროკავშირში ინტეგრაცია ამარტივებს ევროპაში გადაადგილებას.  ევროკავშირის თითოეულ მოქალაქეს აქვს უფლება ისწავლოს, იმუშაოს ან პენსიაში გავიდეს ევროკავშირის ნებისმიერ ქვეყანაში. დასაქმების, სოციალური დაცვის და საგადასახადო საკითხებში ისინი ადგილობრივ მოქალაქეებს უტოლდებიან. ეს ხელს უწყობს ტალანტების მობილობას და შრომის ფართო ბაზარზე წვდომას.

ეკონომიკური სტაბილურობა: ევროზე გადასვლამ, რომელსაც 340 მილიონზე მეტი ევროკავშირის მოქალაქე იყენებს, გააუქმა ვალუტის მერყეობის რისკები და კურსის ცვლილებით გამოწვეული ხარჯები, გააძლიერა ერთიანი ბაზარი და უზრუნველყოფს ეკონომიკურ სტაბილურობას.

ციფრული სერვისები: ევროკავშირის ფარგლებში, როუმინგის საფასურით, ბიზნესებსა და მომხმარებლებს შეუძლიათ, გამოიყენონ სატელეფონო და ონლაინ სერვისები წევრ ქვეყნებში დამატებითი საფასურის გარეშე, რაც ხელს უწყობს კომუნიკაციას.

დასაქმებულთა უფლებები: ევროკავშირში დასაქმებულები სარგებლობენ ჯანმრთელობასა და უსაფრთხოებასთან, თანაბარ შესაძლებლობებთან, დისკრიმინაციისგან დაცვისა და შრომის კანონებთან დაკავშირებული უფლებებით, რაც, თავის მხრივ,  სამართლიან და უსაფრთხო სამუშაო გარემოს უზრუნველყოფს.

მონაცემთა დაცვა: ევროკავშირის მტკიცე პოზიცია ადამიანის ინდივიდუალური უფლებებისა და პერსონალური მონაცემების დაცვის საკითხებში უზრუნველყოფს, რომ ბიზნესი და მომხმარებლები უკეთ აკონტროლებენ პერსონალურ მონაცემებს, რაც ზრდის ნდობას და უსაფრთხოებას ციფრულ ტრანზაქციებში.

მომხმარებელთა დაცვა: ევროკავშირის მოქალაქეებს იცავს პროდუქციის ხარისხისა და უსაფრთხოების მკაცრი სტანდარტები. მათ შეუძლიათ, დაიბრუნონ გადახდილი თანხა არასასურველი პროდუქციის დაბრუნებისას და მიიღონ კომპენსაცია მოგზაურობისას თავიდან აცილებადი რეისების დაგვიანებისა თუ გაუქმების დროს.

ევროკავშირი გლობალური ვაჭრობის ლიდერია: ევროკავშირი ყველაზე დიდი სავაჭრო გაერთიანებაა მსოფლიოში, წარმოებული პროდუქციისა და მომსახურების უდიდესი ექსპორტიორი და იმპორტის უდიდესი ბაზარი 100-ზე მეტ ქვეყანაში.  ეს შესაძლებლობას აძლევს ქართულ ბიზნეს სექტორს, ისარგებლოს ფართო სავაჭრო ქსელებით და შესაძლებლობებით.

მცირე ბიზნესის მხარდაჭერა: ევროკავშირი მხარს უჭერს მცირე ბიზნესს და უზრუნველყოფს დიდი კომპანიების სამართლიან დაბეგვრას.  პროგრამები, როგორიცაა Erasmus+, მოქალაქეებს სთავაზობს ტრენინგებს, რაც ხელს უწყობს კარიერული შესაძლებლობების გაუმჯობესებას და ხელს უწყობს კვალიფიცირებულ სამუშაო ძალის შექმნას.

გარემოსდაცვითი სტანდარტები: ევროკავშირის პოლიტიკა მიზნად ისახავს კლიმატის, ჯანმრთელობისა და ბიომრავალფეროვნების წინაშე არსებული რისკების მინიმიზაციას, რაც მსოფლიოს ერთ-ერთი ყველაზე მკაცრი გარემოსდაცვითი სტანდარტების შექმნას გულისხმობს. ეს შეესაბამება ქართული კომპანიების მზარდ ფოკუსს მდგრად პრაქტიკებზე, განსაკუთრებით სოფლის მეურნეობაში და ინდუსტრიაში.

სურსათის უსაფრთხოება და ხარისხი: ევროკავშირის რეგულაციები უზრუნველყოფს მაღალ სტანდარტებს სურსათის წარმოებასა და გადამუშავებაში, როგორც ევროკავშირის შიგნით, ასევე იმპორტირებული და ექსპორტირებული საქონლისთვის. აღნიშნული უზრუნველყოფს, რომ ქართული სასოფლო-სამეურნეო პროდუქცია აკმაყოფილებდეს უსაფრთხოებისა და ხარისხის მკაცრ სტანდარტებს, რაც ზრდის მის კონკურენტუნარიანობას.

ერთიანი ძალისხმევა: საერთაშორისო სცენაზე ერთიანი ძალისხმევით,  ევროკავშირმა გლობალურ ვაჭრობაში ძლიერი პოზიცია დაიკავა. ეს კოლექტიური მიდგომა ქართული ბიზნესისთვის ევროკავშირის სახით სანდო და გავლენიან პარტნიორს უზრუნველყოფს საერთაშორისო ბაზრებზე.

ევროპული სტანდარტები და ქართული კომპანიები

ევროპული ინტეგრაციის ერთ-ერთი მთავარი ასპექტი მკაცრი გარემოსდაცვითი და სოციალური სტანდარტების დაცვაა. ქართული კომპანიები სულ უფრო ხშირად ნერგავენ აღნიშნულ სტანდარტებს, რათა საკუთარი საქმიანობა ევრორეგულაციებთან შესაბამისობაში მოიყვანონ და ევროპულ ბაზარზე კონკურენტული უპირატესობა მოიპოვონ.

 ევროპის მწვანე შეთანხმების პრინციპების დანერგვა ბიზნესს საშუალებას აძლევს, ინვესტიცია ჩადოს ენერგოეფექტურობასა და მდგრადი რესურსების მართვაში.

სოფლის მეურნეობა, რომელიც საქართველოს ეკონომიკის ქვაკუთხედია, მდგრად პრაქტიკაზე გადასვლის პროცესშია. ორგანული მეურნეობის ტექნიკის გამოყენებით და სათბურის აირების გაფრქვევის შემცირებით, ქართული კომპანიები უზრუნველყოფენ, რომ მათმა პროდუქციამ ევროპელი მომხმარებლების მაღალი სტანდარტები დააკმაყოფილოს. ეს ტრანსფორმაცია მხოლოდ რეგულაციების დაცვა არ არის – ეს არის მდგრადობის გრძელვადიანი სარგებელის აღიარება, პროდუქციის გაუმჯობესებული ხარისხიდან დაწყებული – ბრენდის რეპუტაციის გაუმჯობესებამდე.

ინოვაცია და ინვესტიცია

ევროპული ინტეგრაცია, ასევე, ხელს შეუწყობს ინოვაციებს ქართულ კერძო სექტორში. ევროკავშირის ბაზრებზე და ფინანსურ შესაძლებლობებზე წვდომამ სხვადასხვა ინდუსტრიის განვითარება დააჩქარა. ტექნოლოგიური კომპანიები მუშაობენ ინოვაციურ გადაწყვეტილებებზე ენერგოეფექტურობის, ნარჩენების მართვის და ჭკვიანი სოფლის მეურნეობის მიმართულებით, რაც ხელს უწყობს უფრო მდგრად და მედეგ ეკონომიკას.

ინვესტიციები ნაწილდება იმ სექტორებში, რომლებიც პრიორიტეტს მდგრადობას ანიჭებენ. ევროპის რეკონსტრუქციისა და განვითარების ევროპის ბანკი (EBRD) და სხვა საერთაშორისო საფინანსო ინსტიტუტები მხარს უჭერენ ქართულ საწარმოებს მწვანე დაფინანსებით, რაც მათ საშუალებას აძლევს დანერგონ ეკოლოგიურად სუფთა ტექნოლოგიები და პრაქტიკა. ეს ინვესტიციები არა მხოლოდ ბიზნესის ზრდას უწყობს ხელს, არამედ უზრუნველყოფს, რომ ეს კომპანიები განვითარდნენ გარემოსდაცვითი მდგრადობისა და სოციალური პასუხისმგებლობის გათვალისწინებით.

კონკურენტუნარიანობის გაუმჯობესება

საქმიანობის ევროპულ სტანდარტებთან შესაბამისობაში მოყვანით,  ქართული კომპანიები საკუთარ გლობალურ კონკურენტუნარიანობას ზრდიან. ევროკავშირის რეგულაციების შესაბამისად ოპერირება ხსნის ახალ ბაზრებს და ზრდის შესაძლებლობებს. ეს განსაკუთრებით ცხადია წარმოების სექტორში, სადაც ბიზნესი ხვეწს პროცესებს ევროკავშირის ხარისხისა და უსაფრთხოების სტანდარტების დასაკმაყოფილებლად, რაც, თავის მხრივ, ზრდის მათ საექსპორტო პოტენციალს.

მდგრადი მომავლის აშენება

კერძო სექტორის როლი საქართველოს ევროპულ ინტეგრაციაში ეკონომიკური სარგებლის მიღმა ვრცელდება. ბიზნესი ასევე მნიშვნელოვან როლს ასრულებს სოციალურ ცვლილებებში და გარემოსდაცვითი მართვის ხელშეწყობაში. კორპორაციული მდგრადობის ინიციატივების საშუალებით, კომპანიები ინვესტიციას ახდენენ საზოგადოების განვითარებაში, განათლებასა და გარემოს დაცვაში.

გამოწვევები და შესაძლებლობები

მიუხედავად იმისა, რომ ევროპული ინტეგრაცია უამრავ შესაძლებლობას იძლევა, ამ გზაზე არის გამოწვევებიც.  ქართულ ბიზნეს სექტორს მოუწევს რთული რეგულაციებთან ადაპტაცია და ოპერირების გაუმჯობესებაში მნიშვნელოვანი ინვესტიციების ჩადება. თუმცა, ამ ინვესტიციების გრძელვადიანი სარგებელი მნიშვნელოვნად აღემატება საწყის ხარჯებს. კერძო სექტორის პროაქტიული მიდგომა მდგრადობისა და ევროპული სტანდარტების მიღების მიმართულებით უზრუნველყოფს, რომ საქართველო წარმატებით შეუერთდება ევროპულ ოჯახს და რეგიონში მდგრადი განვითარების მოდელი გახდება.

და ბოლოს,

ევროინტეგრაციის გზაზე კერძო სექტორი  გადამწყვეტ როლს ასრულებს. მდგრადი პრაქტიკის დანერგვით, საქმიანობის ევროპული სტანდარტებთან შესაბამისობაში მოყვანით და ინოვაციებში ინვესტირებით, ქართული ბიზნესი აძლიერებს საკუთარ კონკურენტუნარიანობას და ხელს უწყობს ქვეყნის ეკონომიკურ, სოციალურ და გარემოსდაცვით პროგრესს.

მომავალი შესაძლებლობებით სავსეა და კერძო სექტორის ერთგულება მდგრადობის მიმართ იქნება საქართველოს ევროკავშირში წარმატებული ინტეგრაციის საფუძველი.

სტატიის მომზადებისას გამოყენებულია შემდეგი წყარო:

https://european-union.europa.eu/priorities-and-actions/eu-priorities/achievements_en