კორპორაციული მდგრადობის სასერტიფიკატო კურსი

მოდული მოიცავს ბიზნეს ეთიკის ცნებას, მის თეორიულ განმარტებას, პრაქტიკისა და თანამედროვე მიდგომების ერთობლიობას, რაც დაეხმარება ორგანიზაციას გადაწყვეტილების მიღების დროს ეთიკური პრინციპების დაცვაში.

საუბარს ვიწყებთ ეთიკის განმარტებით: თუ რა არის ეთიკა და რას წარმოადგენს ის ყოველდღიურ ცხოვრებაში, რა სხვაობაა ეთიკასა და სამართალს შორის, ეთიკის დასაცავად რეაქტიული თუ პროაქტიული მიდგომების გამოყენება, თუ რას გულისხმობს ეთიკური გადაწყვეტილებების მიღება და რატომ არის ეს მნიშვნელოვანი. აგრეთვე, რა გავლენას ახდენს სწორი ეთიკური გადაწყვეტილების მიღება ორგანიზაციაში მომუშავე თითოეულ თანამშრომელზე, ორგანიზაციის იმიჯსა და რეპუტაციაზე. მსოფლიოს სხვადასხვა ქვეყნის, მათ შორის საქართველოს მაგალითების შესწავლით ერთად გამოვიყენებთ ეთიკური გადაწყვეტილების მიღების საერთაშორისოდ აღიარებულ პრაქტიკულ ტესტს.

მოდულის ფარგლებში ვისაუბრებთ ზოგადად ლიდერობაზე, ლიდერობის სხვადასხვა სტილზე, ლიდერის თვისებებსა და უნარებზე. განვიხილავთ ეთიკურ ლიდერობას, ღირებულებებს, ნორმებს, დამოკიდებულებებსა და ქცევას. გავარჩევთ ეთიკური ლიდერობის მოდელებს, პრინციპებს, მათი ჩამოყალიბების პროცესს. გავარკვევთ რა გრძელვადიანი უპირატესობის შემქმნელი შეიძლება იყოს ეთიკური ქცევის და კორპორაციული პასუხისმგებლობის მიმართ ერთგულება კომპანიებისთვის. მოვიყვანთ ამის საერთაშორისო და ადგილობრივ მაგალითებს. მოდული ასევე მოიცავს ადამიანური რესურსის მართვის მიმართულებით თანამედროვე პრაქტიკას და მის კავშირს კორპორაციულ მდგრადობასთან.

მოდული ფარავს ორ ძირითად თემას:

• რატომ კორპორაციული მდგრადობა – რა გავლენა აქვს კომპანიის გრძელვადიან პასუხისმგებლიან ხედვას და მდგრად მიდგომებს თანამშრომლების პროდუქტიულობაზე?
• როგორ უზრუნველვყოთ HR პროცესების ეფექტური მართვა ორგანიზაციაში?

მოდული მომზადებულია საერთაშორისოდ აღიარებული სტანდარტების, საქართველოს კანონმდებლობასა და პრაქტიკულ მაგალითებზე დაყრდნობით და ფარავს ისეთ საკითხებს, როგორიცაა:

• კორპორაციული მართვის მეთოდები სხვადასხვა იურისდიქციებში;
• კორპორაციული მართვის ევოლუცია;
• კორპორაციული მართვის სისტემების აღწერა;
• საწარმოს მმართველი ორგანოები;
• პასუხისმგებლობა და მათი ფიდუციური მოვალეობების ზოგადი მიმოხილვა;
• ცნობილი ფინანსური კრიზისების გამომწვევი შესაძლო მიზეზები;
• გარემოსდაცვითი, სოციალური და კორპორაციული მართვა (ESG);
• საქართველოში დაწესებული მოთხოვნები კორპორაციული მართვის კუთხით, პოსტ COVID-19 მიდგომები კორპორაციულ მართვასთან დაკავშირებით.

მოდულის ფარგლებში განვიხილავთ კორუფცისთან ბრძოლის მიზეზებს, შესაბამისობის ფუნქციის როლს კორუფციასთან ბრძოლაში, შესაბამისობის რისკის მართვის საუკეთესო პრაქტიკას, კორუფციის რისკის განსაზღვრასა და კავშირს კორპორაციულ მართვასთან, კეთილსინდისიერების პრინციპსა და ეთიკურ ნორმებთან.

ამასთანავე მოდულის ფარგლებში ვისაუბრებთ კერძო სექტორისთვის კორუფციასთან ბრძოლის კუთხით არსებულ საერთაშორისო სტანდარტებსა და საუკეთესო პრაქტიკაზე.

მოდული ფარავს მდგრადობის სოციალურ და გარემოსდაცვით მიმართულებებს:

• სოციალური ჭრილი მოიცავს ბიზნესისა და ადამიანის უფლებების ძირითად საერთაშორისო ჩარჩო სტანდარტებისა და პრაქტიკის ანალიზს. განხილულია როგორც საერთაშორისო, ისე ადგილობრივი კონტექსტი.
• გარემოსდაცვითი ჭრილი მოიცავს ისეთ ძირითად საკითხებს, როგორიცაა: ბიზნესის მწვანე პასუხისმგებლობა, ნარჩენების ეფექტური მართვა და კლიმატის ცვლილება.

აღნიშნული თემები დაკავშირებულია, როგორც პლანეტარული ჯანმრთელობის კონცეფციასთან, ასევე, თითოეული ჩვენგანის მოქალაქეობრივი თუ კომერციული საქმიანობის განხორციელების თვითშეგნებასთან. მოდულის ფარგლებში მსმენელები შეძლებენ პრაქტიკული სავარჯიშოების დახმარებით შეაფასონ კომპანიის საქმიანობა სოციალურ და გარემოსდაცვით ჭრილში, განსაზღვრონ საკითხების მატერიალურობა და შეიმუშავონ მდგრადობის სტრატეგია.